Жасалма интеллект 2026-жылы жаңылык чөйрөсүн кандай өзгөртөт?

 

Сүрөт Gemini’нин жардам менен жаратылды

 

Жаңылык индустриясы үчүн манилүү жылдын алдында BBC, WSJ, Scroll, NPO, SZ, Semafor, New York Times жана башка редакциялардын адистери арасында жүргүзүлгөн сурамжылоонун жыйынтыктары менен тааныштырабыз.

Дүйнөнү катуу өзгөрткөн ChatGPT ишке киргизилгендигине үч жыл боло турган 2026-жылга кирип жатып журналисттер жана медиаменеджерлер: генеративдик ЖИге жана жаңылыктарга байланыштуу дагы кандай чоң өзгөрүүлөр бизди күтөт болду экен деп түкшүмүлдөшөт.

 

Авторлор бул жаатта иштеген бир катар белгилүү адистерге жана жалпы аудиторияга кайрылып, жаңы жылда кандай жаңылыктарды күтсө болот деген тариздеги суроо узатышты.

 

Сурамжылоонун жыйынтыгы көрсөткөндөй, алар негизинен 5 трендди белгилешкен:

 

1. Аудитория барган сайын жаңылыктар менен жасалма интеллект аркылуу көбүрөөк тааныша баштайт

 

Аудитория маалымат издеп жатып жасалма интеллекттин негизинде иштеген чат-ботторду, издөө системаларын жана башка аспаптарды көбүрөөк колдоно баштады. Ошондуктан жаңылык менен таанышуунун салттуу жолун колдонгон учурлар азайып, ЖИнин жардамы менен түзүлгөн жаңылык материалдар алдыңкы орунга чыгат. Бул эң көп берилген жооп болду: адистердин жана аудиториянын басымдуу көпчүгүлүгү ушундай пикирди карманышат.

 

2. Маалыматты текшерүүгө – фактчекингге муктаждык өсөт

 

Жаңылыкка жетүү жеңил, бирок ага ишеним аз болгон заманда жаңылык басылманын абройлуулугуна өзгөчө көңүл бурула баштайт. Аудитория интернеттен алган маалыматтын жүйөлүүлүгүн жана анын булагын билгиси келет, ал эми жаңылык басылмаларында бул муктаждыкты канааттандыруу үчүн мүмкүнчүлүк түзүлөт.

 

3. Автоматташтыруу жана ЖИ-агенттер жаңылыктар редакциясынын өзгөрүүсүнө алып келет

 

ЖИ жаңылыктар редакциясында кеңири колдонула баштайт: ЖИ контентти башкаруу системасынын (CMS) жана редакциянын иш процессинин ажырагыс бөлүгү болуп калат. Айрым маалыматтардын жарыяланышы автоматташтырылып, аларды ЖИ-агенттер жасап турат, ал эми макалалар автоматтык түрдө жаңыланып турат. 

 

Бардыгы эле муну жакшы жышаан катары кабылдабайт. Аудиториянын айрым өкүлдөрү, өзгөчө студенттер жана жаштар, жумуш орундарынын кыскарышына жана жасалма интеллекттин өтө эле кеңири колдонула башташына байланыштуу тынчсызданууларын билдиришүүдө.

 

4. Редакциялар кызматкерлеринин квалификациясын жогорулатып, ЖИни колдонуу үчүн инфратүзүмдү түзө башташат

 

2026-жыл редакциялар жасалма интеллекттин мүмкүнчүлүктөрүн болушунча натыйжалуу колдонуу үчүн инфратүзүмгө жана окутууга инвестиция сала баштаган жыл болушу мүмкүн. Бул өзгөчө азырынча тийиштүү адистери жана жетиштүү каражаттары жок чакан редакцияларга тийиштүү.

 

5. Жасалма интеллект көп маалыматтар менен иштеген журналисттердин мүмкүнчүлүктөрүн кеңейтет

 

Маалыматтар менен иштеген журналисттер ЖИни көптөн бери колдонуп келишет жана бул технологиялар улам жакшырып, жеткиликтүү болгон сайын, редакцияларда мурда элестетүү мүмкүн болбогон сандагы документтер менен иштөөгө мүмкүнчүлүк түзүлөт.

 

Резюме: 2026-жылы ЖИ «эксперимент» катары гана кабылданбай калат. Ийгиликтүү редакциялар үчүн ал негизги инфратүзүм болот, ал эми аудитория үчүн – дүйнөдөгү окуяларга чыпка-терезе. Бул жылдагы башкы маселе – контентти машианалар жаратып, керектеген заманда этикалык стандарттарды жана ишенимди сактап калуу.

 

 

Бул жыл сайын медиа чөйрөсүндөгү негизги маселелер боюнча дүйнөлүк деңгээлдеги изилдөөлөрдү жүргүзгөн Reuters институтунун веб-сайтында жарыяланган макаланын англис тилинен котормосу.

 

Макаланы толугу менен бул шилтеме боюнча окуса болот.